Descrición

A proba de que se pode conservar a tradición sen renunciar á profesionalidade e ao bo gusto cobra forma neste balneario en pleno casco histórico de Caldas de Reis, a carón do río Umia, onde unha estilosa reforma o encheu de cor e aires renovados sen que o conxunto perdera o sabor de antano.

O fogón, que segue a prenderse no inverno, convida a recollerse, a ler ou parolar mentres do outro lado das cristaleiras do salón asoman as copas do incrible canaval que, ao parecer, plantou a principios do XX un antepasado que viaxou ás Filipinas e a quen, probablemente, se deba parte do regusto colonial do edificio de 1780.

A actual é xa a sexta xeración da mesma familia a que se ocupa deste balneario levantado sobre unha fonte na que xa se somerxían probablemente os celtas, polo que a vocación por conservar todo o conservable apálpase en cada recullo: os mobles de época, os espellos, as portas de cristal biselado, as lámpadas e incluso algún dos aparellos de inhalacións; todo restaurado e perfectamente operativo. Outra máis das súas peculiaridades é a elevadísima temperatura á que traballan as augas, 48º, a posibilidade de reservar a piscina termal pequena para bañarse acompañado unicamente das persoas que un desexe, ou que, ao estar no Camiño de Santiago, sexa tradición lavar os pés nas súas augas ou nas da burga da entrada.