Descrición

Vivir, acadar metas, traballar, manter o ritmo… todo isto fai que o noso corpo se resenta e que mereza un respiro. Desconecta, reláxate, goza. Recupera a vitalidade nas terapéuticas e saudables augas das Termas Romanas de Lugo. As instalacións e o prestixio das súas augas mineromedicinais están ao teu servizo.

As augas da súa fonte xa as utilizaban os romanos como demostran as ruínas das súas antigas termas, declaradas Ben de Interese Cultural e abertas ás visitas dentro do propio balneario. Unha das captacións de auga, protexida hoxe por unha pirámide de vidro, é tamén a que utilizaron os romanos, e ata a antiga palestra en que realizaban os seus exercicios emerxeu durante as obras de ampliación da cafetería.

Situado á entrada da cidade, cun paseo axardinado duns dez quilómetros na ribeira do Miño, este establecemento conta cun edificio do século XIX totalmente reformado que alberga a maioría dos cuartos e o chamado balneario terapéutico. Nun anexo, outro edificio levantado no 2001 con outra vintena de cuartos e o moderno balneario lúdico, máis orientado a tratamentos de relax e beleza. E todo a dous pasos de tódolos alicientes da cidade de Lugo.